Жанарыңда жалтылдаса жалаң нұр

Жанарыңда жалтылдаса жалаң нұр,
Қас-қабағың қара көзге қамал-дүр!
Жалғаншының жарағынан жасқанбай,
Алдамшының амалынан аман жүр.
Жайың сенiң бiр күн жарлы, бiр күн бай,
Қайың сенiң қатар өскен құрбыңдай.
Қызығыңа ғазиз басым – құрбандық,
Қырық жылда бiр келетiн қырғындай!
Қырық күн ғой шiлдеңiз де шiлiңгiр,
Одан арғы ғұмыр шiркiн бұлыңғыр...
Сөз шырынын таңдайыңа тамыз да,
Көз шырымын кiрпiгiңе iлiндiр.
Тəн талықсып,
Тамыр бойлап шырын бал,
Бал бөбектей байыз тапсын шыбын жан.
Ода оқып отырайын басыңда
Көздерiңе бiр ашылып-жұмылған...

---