Арыс бойы жиделі – Исраил Сапарбай

Торғын тоғай,
Көкорай,
Жиделі жай.
Жалғыз аяқ соқпақтың иреңін-ай.
Жалғыз аяқ соқпақпен келе жаттың
Уағдалы жеріңе, сүйгенім-ай.
Жиделі жай келіпті-ау кемеліне,
Көк тоғайдың енейік тереңіне.
Қалып қойсақ қайтеді осы арада,
Бүгін үйге қайтудың керегі не?
Жұпарына жиденің еліттің бе,
Құшағымда барасың еріп мүлде.
Жағалауы Арыстың жиделі екен,
Жиделіге тұрайық келіп күнде.
Алыстарға жатыр ғой Арыс ағып,
Толқынында жүзелік, жарысалық.,
Жағасында Арыстың айрылысып,
Жағасында Арыстың табысалық...