Исраил Сапарбай

Жалғыз жапырақ

Бұл бетте «Жалғыз жапырақ» атты Исраил Сапарбай жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

20.07.2021
0
0
1058

Күз желі...
Жапырақтар ұшып жатыр.
Ұшып жатыр,
Қалықтап түсіп жатыр.
Сарғайған санадағы соңғы үміттей
Бір жапырақ бұтақтың ұшында тұр.
Қара құс қараталға қонды бөтен.
Сол бұтақ,
Сорайған түп,
Соңғы мекен...
Безектеп,
Безгегі ұстап қалтырайды –
Тосырқап күз райын тоңды ма екен?..
Ішқұста, үнсіз зарын тыңдайды кім?
Кəнеки, итке берсе мұндай күнін?!
Қош айтып,
Қолын бұлғап қайтқан қазбен
Өтеді,
Тоқтамайды,
Зырлайды күн...
Жас дəурен,
Жаймашуақ,
Құт, несібе –
Көктемі күн кешегі түсті есіне:
«Оғынан Күз-мергеннің
Өзінің де
Кім кепіл, жерге үзіліп түспесіне?!.»
Көзінен бал-бұл ұшып жасыл аймақ,
Жапырақ жабырқай ма осыны ойлап?..
Жарқын жаз,
Жайдары əлем қайда бүгін
Жататын нөпір нөсер, жасыны ойнап?.
Күз желі...
Жапырақтар ұшып жатыр.
Ұшып жатыр,
Қалықтап түсіп жатыр.
Сарғайған санадағы соңғы үміттей,
Бір жапырақ бұтақтың ұшында тұр...

Исраил Сапарбай жалғыз жапырақ... Исраил Сапарбай өлеңдері

Пікірлер (0)

Пікір қалдырыңыз

Жиі қойылатын сұрақтар