Жылаған жүрек жұбанар – Исраил Сапарбай

Жылаған жүрек жұбанар,
Қуарған көңіл қуанар.
Жылы орнын қайтып қия алар
Жығылған жанға жыра, жар?
Құбылған мынау қу дүние
Кімдердің құлқын құп алар?
Құлқынға құрдым кетпесе,
Қалаған тұстан су ағар.
Кімдерде қандай кінə бар,
Кімдерде қандай күнə бар? –
Күндердің күні болғанда
Үлкен де кіші сыналар.
Бергенің менен алғаның,
Келгенің менен барғаның...
Бəрі де бəрі сұралар.
Ұрығы өскен далаға,
Ұрпағы ілескен балаға
Атадан қалған аманат,
Бабадан қалған мұра бар...