Маршалдың приказы

(Клим Ворошиловтың 60 жасқа толуына)

Москва!
Кең,
Көрікті
Қызыл Алаң!
Қалын, әскер,
Есептер әрең қалам!..
Бірінші май!
Жұпарлы шуақ ауа,
Аспан айна,
Күн де тұр күле қаран.
Мен тұрмын
Мавзолейдің
оң жағында.
Тұрмын
Тоты қанатты —
Гүл бағында!
Айналам жалын түсті —
Қызыл тулар,
Тұрмын толқып
Ту мен күй
ырғағында.
Әскерлер,
Жиі-жиі
Топтаса тұр.
Бойына,
Жауға ажал
Оқты аса тұр.
Қалың жұлдыз ішінде
Үркердей боп,
Шөкімдей-ақ
Соғыстық Атташе тұр.
Кекте күнге баққандай
Сансыз жұлдыз,
Кремльге көз тіге
Біз де тұрмыз...
Бір кезде,
Сатыр-сұтыр шапалақтан
Теңселгендей боп кетті
Таудан: шың, құз!
Қасында
Ленин құрған —
Болат штаб
Келеді Мавзолейді
Бәрі нұсқап.
Күлімсіреп қояды,
Төңірекке,
Калинин —
Жетпіс ұлтқа староста!
Шықты олар
Мавзолейдің иығына.
Көз тікті
Кең Союздың қиырына.
Москвада ғана емес,
Бар Союздың
Тұрды олар араласып
Жиынына.
Бір кезде...
Кремль
Кең ашып қақпа
Ақ қасқа,
Шымқай жирен —
Тұлпар атқа
Шабытты сұңқардай боп
Қонған біреу,
Шықты да
Тура тартты әскер жаққа.
Дулады шапалақтар
Сарт-сұрт еткен,
Үздіксіз оқ атқандай
Пулеметтен.
Честь беріп салтанатты
Ту алдында,
Ол өтті амандасып
Қалың көппен.
Ордендар қатарланған
Өңірінде,
Белде қылыш,
Наганы кабурында;
Ұршықтай үйіріліп
Жирен қасқа,
Билей басып...
Жел шабыс көңілінде...
Бұл,
Клим Ворошилов!—
Біздің Маршал!
Әскер жым бола қалды,
Тұрған қоршап.
Жұрт сөзі:
«Жарты жүзден жасы асты,
Сонда да әлі жап-жас,
Емес шаршар!»
Дегенде әскерге ол —
«Амансыздар!»
«Аманбыз!» деп естілген
Тұтас «з-з-здар!..
Найзағайдай
Жер шарын орағанда,
Дос жылынып,
Жауларға болды ызғар.
«Аттаныс маршы» ойнады
Екпінді саз!
Ол сазды тыңдады ел!..
Тыңдады жаз!..
... Түсті аттан.
Мавзолей иығынан
Армияға жалынды берді

ПРИКАЗ
Айта кеп приказда
Барлық халді,
Қыздыра сөйлеп,
Отан сүйген жанды,
Сөз аяғын тойтарды
Былай Маршал:
«Армия!
Тыңда!
Менен,— деп,— команда!..
Қалың жау,
Айналаны тұрған қоршап,
Қасқырдай ұлиды олар
Қанды аңсап,
Бірақ бізге соқтықса
Қирамақшы,
Ескі өмір —
Тозығы жеткен қаусап.
Капитал дүниесі сырқат —
Сүзек!
Сүзектен есіріп ол,
Жарды сүзед,
Ауруын
Жаймасын,
Жұқтырмасын,
Команда:
«Шекараны берік күзет!»
Сол кезде,
Секілденіп бейне тасқын,
Жердің бетін,
Төбеде аспан астын
Самолет, танк жауып,
Союз жерін
Екпінді алып тұрды,
Бір тұтас үн.
Ол үн:
«Егер жау бізбен күшін өлшеп,
Алуға ниет етсе,
Бізден бөлшек,
Жермен-жексен етеміз,
Кең Отаннан,
Жаулар жер ала алмайды,
Жалғыз вершок!»
Капитал жері бүгін
Қанның жазы,
Советтер Союзында —
Бақыт сазы,
Осы жазда жасаған
Біздің елдің
Есінде,
Маршал берген — приказы.

1941

---