Өмірге мынау жай келмей, тамсана келгін – Есей Жеңісұлы

Өмірге мынау жай келмей, тамсана келгін,
Байыз таппайды-ау бақытты аңсаған көңлің.
Ерлігі дұрыс бағасын ала алмай, бекер,
Қалды екен сайда қу басы қаншама ердің...
Армандар неге тез өлім құшады жиі?
Өмірдің сыйы көбірек құсалы, қилы.
Арқырап келген арынын су сепкендей ғып,
Қаншама ерді тірліктің тұсауы қиды...
Жауырлы жабы көретін ақтаңгер ұлды,
Еңбектен емес, ештен дер аққан теріңді...
Белсеніп түйіп беліңді, бекініп шықсаң,
Алдыңнан алты қабатты арқан керулі.
Намыста нұсқа қалмаған, ақылда – тұспал,
Мейірім түгіл, жылу жоқ жақынға мысқал.
Қара басыңды қаңсытып, билік айтуға,
Қазаннан бұрын қайнайтын қатын да құштар.
Өткенің үшін сұрама қайтадан сауға,
Айналаң бәрі – күн үшін қайнаған сауда.
Ей, қоғам!
Ердің ерлігін түсінбесең де,
Сенен өтінем, бекерге байбалам салма...