Іздеме мені

Апта мен айлар ауыспақ түгіл,
Жылдардың көші қыр асты.
Мұңдарды мұжып тауыспақ түгіл,
Жас келер көзге тым ащы.

Жаныма азық аламын кейде,
Ән-жырдан және жаңбырдан.
Керуеншіге ұқсаймын бейне,
Жүзігін артта қалдырған.

Өзгертер едім жүзігім барда,
Қысты да жасыл көктем ғып.
Бас игізбейді мендегі дара,
Тәкаппарлық пен өктемдік.

Кешіп келемін құмырсқа тірлік,
Қиялды жиып шарқ ұрған.
Ғұмырым қалды бір жарты күндік,
Іздеме мені артымнан.

Қырсықтығыма күрсініп көктем,
Шықтарын төккен таң жылап.
Кезінде сеннен көп нәрсе күткем,
Ендігі сөзің сандырақ…

---