Өлең, жыр, ақындар

Шопанға мадақ

  • 24.09.2021
  • 0
  • 0
  • 533
Көзіне таңның үңілесің сен
Құланжал қырдың кенересінен.
Нұрдың уызын сіміресің сен
Алтын зерлі күн тегенесінен.
Қақтырып көңіл-қыранға қанат,
Отарыңды ерте тауға шығарып,
Жатасың оймен қиянға қарап,
Бір шыңды жалғыз жамбасыңа алып.
Күйесің жазғы аптаптар шалып,
Күнгейдің қоңыр тасындай болып.
Маңдайдан моншақ аппақ тер тамып,
Әрбір төліңді асылдай көріп.
Туған жеріңнің толағай тасы
Жасыңнан сырлас, қадірлі саған.
Дауыл айқасы, боран айқасы
Шарпыды қанша жалын құсаған.
Найзағай даусы, жаңбырдың үні
Жырлайды сенің кеудеңе көшіп.
Сен үшін олжа жаздың бір күні,
Жүресің қырда желмен егесіп.
Қыс қайрағына төзімді жанып,
Боз қырау қатты самайыңа да.
Алдыңда жатты көзіңді қарып,
Ақ қар көмкерген қалайы дала.
«Шәйт!» десең егер жаңғыртып қырды,
Айналаң кенет тіл қатып тамам,
Жартастар жауап қайтарып тұрды,
Бабаңның үнін тыңдатып саған.
Жүрсең де оқшау тау арасында,
Жарқылдап таңдай, күнше күлесің.
Дәуірдің барлық ғаламатында
Бар сенің-дағы үлкен үлесің.
Сырласа қалсам сергіп қаламын,
Өзіңсің қырдың ойшыл ұланы.
Ұраны байтақ бейбіт даланың –
Бозторғай менен қойшының әні!..

1981



Пікірлер (0)

Пікір қалдырыңыз

Әншіге

  • 0
  • 0

Ән қандай, әуен қандай, әнші қандай!
Асқақтап бұлтқа барып шаншылардай.
Ерке әуен еркеленіп шыққан сәтте
Көзіңнен ыстық жасың тамшылардай.

Толық

Нөсерден соң

  • 0
  • 0

Шіркін­ай, неткен ғажап мына жалған,
Жаудырап көз алдымда тұна қалған.
Әп­-сәтте күлімсіреп шыға келді,
Көк аспан жаңа ғана жылап алған.

Толық

Мінез

  • 0
  • 0

Ашу менен сезімді үрлеп оттай,
Бірде жағам жалпыға, бірде жақпай.
Осқырына қараймын қос бүйірге,
Үйрене алмай дәртеге жүрген аттай.

Толық

Қарап көріңіз

Пікірлер