Келші, жастық

Қайран жастық, қайдасың, қайран дәурен,
Күндеріңді өткіздім сайрандаумен.
Қайта айналып сен маған оралмайсың,
Дөңгеленіп он екі ай айналғанмен.

Қайырмасы:
Қызыл гүлдер – қызық күндер,
Құдіретіңе табындым.
Жаз дәуренім,
Наз дәуренім,
Сағындым­ау, сағындым.

Күнің қандай жақсы еді таңдандырған,
Түнің қандай тәтті еді алдандырған.
Мың күнімді қазіргі қияр едім,
Бір күніңе кешегі арман қуған.

Қайырмасы.

Бақтарыңмен армансыз сырласайын,
Бұлбұлыңмен алаңсыз мұңдасайын.
Келші, жастық, ғайыптан келші маған,
Өкінбестей қайтадан бір жасайын.

Қайырмасы.

---