Бірге түстік тірлікте от пен суға екеуміз

Бірге түстік тірлікте от пен суға екеуміз,
Қанықпыз ғой бастан бұл өткен сырға екеуміз.
Бірге татып өмірдің ащы дәмін екеуміз,
Көңілдердің шырқадық асыл әнін екеуміз.
Адалдыққа тек қана жүгінеміз екеуміз,
Тұрмыстың кей желімен жүгіреміз екеуміз.
Алатаудан армандай аласамыз екеуміз,
Жоқ нәрсеге бүлініп таласамыз екеуміз.
Бірге тарттық тағдырдың қыспағын да екеуміз,
Уақыт атты ілесіп күшті ағынға екеуміз.
Сылап-сипап көңілдей жауыр атты екеуміз,
Ұстап тұрған шайқалтпай шаңырақты екеуміз.
Жел өтіне маңдайды тостық бірге екеуміз,
Жеттік талай жол жүріп, достық күнге екеуміз.
Тыныштықты үйдегі ұнатамыз екеуміз,
Жылаған жас баланы жұбатамыз екеуміз.
Дүниенің бар-жоғына ортақтасып екеуміз,
Жамандықтан қашамыз, қорқақ басып, екеуміз.
Жапырағынан қайыңның шық санайтын екеуміз,
Бірімізге біріміз ұқсамайтын бөтенміз...
Ұшқан құстың көктегі қос қанаты екеуміз,
Бір өмірдің бір жолға қосқан аты екеуміз?
Күзгі бақтың шығынан моншақ тағып екеуміз,
Армандарға аңсаған шаршап-талып жетерміз.
Кетісуге керісіп қиыспайтын екеуміз,
Бір үйге жүз құбылып, сиыспайтын екеуміз.
Өзенінде өмірдің көшкен сеңдей екеуміз,
Жер бетінен асығып ескен желдей өтерміз...
Жастық шақты мәңгілік аңсайтұғын екеуміз,
Күтуменен ақ таңды шаршайтұғын екеуміз.
Ағарттық па шынымен самайларды бекер біз,
Осы жайлы оңаша қалай ойлайды екенбіз!..

---