Бөлшектенгім келмейді

Шуақ болып шашыламын,
қауызымнан ашыламын,
Сіңіремін әр тініме
Тебірентер ғашық әнін.
Өзгелерше күле алмаймын,
Көлгірсініп жүре алмаймын,
Ұқсап баққан кездерімде
Мен өзімді жиі алдаймын.
Дүниені өз көзіммен,
Өзім болып тек көремін!
Ыңғайлансам әлдекімге
Мен өзімді жек көремін.
Бағынбайтын ережеге,
Жалтақтамас дәрежеңе
Жүрек ісін тыя алмаймын –
Бөлшектеніп сүйе алмаймын!