Көрмеген тыным алып бір – Қалампыр Кенжеғалиева

Көрмеген тыным алып бір,
Жүрсе де шаршап-шалдығып,
Жоғыңды сенің жаһаннан
Іздеумен тапқан бар қылып.
Бойында барын ақ сүтпен
Сіңірген саған нәр қылып.
Анаңмен хабарластың ба,
Жүрсің бе, әлде зар қылып.
Күндізді тұрған жарық қып,
Күннің бір болар арқасы.
Өзеннің суы ортайса
Биіктей түсер жартасы.
Арналы өзен бір күндер,
Сортаң бір шөлге айналар.
Қуатым деген баласын,
Сағынар ана қайдалап...
Уһ-һ-һ!
Мұңлы екен жырдың жалғасы,
Мұңлы екен жырдың жалғасы,
Өзгеше мүлдем айта алман,
Өзгенің сөзін қайталап...