Кеудемнен сызылып бір ән шығарда

Кеудемнен сызылып бір ән шығарда,
Тамшылар қосылады тамшыларға,
Билейді аппақ қайың шаршыларда.
Қолымды көлегейлеп көп қараймын
Көктемге сауын айтқан жаршыларға.
Жүрекке сәулесі бар мұң келерде,
Самал жел саңқылдайды іргелерде,
Жүйріктер жетеді ылғи жүлделерге.
Парасат-пайым айтып сән құрады
Оранып үлделер мен бүлделерге.
Жаныма күмбір қағып күй келерде,
Бозторғай ән іздейді үйренерге.
Сүйріктей сұлу саусақ жетелейді
Сыңғырлап сұлу әуен күймелерде.