Өмірде жақсылық көп!

Бұл өмірде жақсылық көп!
Көктеменің күніндей шат күліп кеп,
Жанарына ұялап тәтті үміт тек,
Гүл сыйлайды
Жас жігіт бойжеткенге,
Лүпіл қаққан жүрегі аптығып кеп.
Өмірде жақсылық көп!
Жақсылық көп!
Сызылдырып
Сұлу қыз ән салады,
Есі кетіп
Бозбала тамсанады.
Ғашық көзбен қарайды,
Ғашық көзбен,
Жолыққандай алдынан аңсағаны,
Тек сонымен жанады-ау,
Жанса бағы...
Әнге айналып
Бар маңы,
Төңірегі,
Сырлы сазға
Бара ма-ау көңілі еріп?!
Қарайды да ол әншіге еміреніп,
Күбірлейді тек іштей тебіреніп:
– Жалын атып қараған жанарың-ай!
Жалынымен
Жанды өртеп барады ма-ай?!
Күміс көмей үніңнен, айналайын,
Ән құдіретін жеткізген, қарағым-ай!
Бұл өмірде жақсылық көп!
Көктеменің күніндей шат күліп кеп,
Жанарына ұялап тәтті үміт тек,
Ән сыйлайды жас ару сүйгеніне,
«Екеуміз ұғысар бір сәтті күт!» – деп...
Өмірде жақсылық көп!
Жақсылық көп!

---