Саясатта нем бар деме

Саясатта нем бар деме, Рысбол!
Саясатта нем жоқ десең, дұрыс сол.
Бар болғыр-ау, сыпайылап одан да
Дeмeйciң бе ұрсудай-ақ ұрысты ол.
Одан әpi бармай-ақ қой қорықсаң,
Саясатты құдайдан да зор ұқсаң.
Саясаттан үрейі ұшқан күнде де
Қанды шептен жортып өтті жорық сан.
Қарт саясат қанды қолға көшкенде
Опат болды қатыгезге еш пенде.
Кім күнәһар?.. Ажал добын жаратқан
Кемеңгерге құдай соны кешкен бе?!
Бүгіндері өзгерсе де күн одан,
Ат-тоныңды ала қашпа күнәдан.
Саясатқа жаппа жала, бейшара,
Саядан тыс — саясатсыз кім адам?..
Айт та, айт тек, саясатшыл кім деңіз,
Тағдыр iciн тапсырамыз кімге бiз?..
Саясатты сатып атын шығарған
Құнсызбен де туған еді-ау құнды егіз?!
Оны біздер елден, жерден аластап,
Артық дедік жатпен ауыз жаласпақ.
Сонда да біз деп едік-ау даурығып
Мақсат үлкен, жортуылда жол асқақ.
Саясаттың сезу үшін ығын жер,
Дейміз оған жүз көктемнің жүгін бер.
Соншалықты сауықты ма саясат?
Қатал сұрақ — қатал сынақ бүгіндер.
Астамшылық ел пікірін езгенде,
Бас шұлғысу сезбегенсіп сезгенде,
Сары аяздай саясаттың салқынын
Дей алмайсың көруден де көз кенде.
Саясаттан безінбе сен, Рысбол!
Ол да әзірше осал десең, дұрыс сол.
Сезген сайын кешегі салт салқынын,
Умаждау шарт қос уыста құрыш қол.
Мемлекеттік құқық бар ма бұл жұртта
Сөзді қой да, соның заңын бұлжытпа!

Қаңтар, 1997

---