Таланттан сыйын тағы алсын – Хамит Ерғалиев

Ойласам бip сәт оңаша,
Көп жылдың жырын жырлаппыз.
Қашан да біздер жаңаша
Мезгілге демеу, жұрнақпыз.
Жырланды жоқтық,
таршылық.
Күрестен туған дос-жарлар;
Қайғыдан адам аршылып,
Хикая болды жоспарлар.
Соқа мен қайла, зеңбірек
Қалған жоқ артта өлеңсіз;
Жапанда жалау желбіреп,
Жанданды белес-бел елсіз.
Ойласам бip сәт оңаша,
Көп жылдың жырын толғаппыз,
Арманға біздер жаңаша
Көңілдің күйін жалғаппыз.
Жырлаймыз ені бақыттың
Биылғы биік тұлғасын.
Коммунисттік уақытты
Ақындар асқақ толғасын!
Космосқа қарай зымырап
Жолаушы барған жолымдай,
Ендігі ғұмыр ғұмыр-ақ,
Шолпаннан жарық ол ыңғай.
Артықша биыл дәуір бар
Бағына барша тараптың.
Жырлайық жолын, бауырлар,
Қабілет, ақыл, талаптың.
Ажал мен апат жоғалсын
Адамның көзін жұмарлық!
Таланттан сыйын тағы алсын
Өмipгe деген құмарлық!