Таным талқысы

Зиялылар хат жазысып айтыспақ
Халқымызға қажет болған қай тұста-ақ.
Ел бip жасап қалушы еді-ау сол сайыс
Сарғая жұрт күткен жерге сай түссе ақ
Бір арнаға құйып түрлі толғаныс
Жадымызда соны соқпақ болған іс.
Тапқыр таным аздан көпке ауысып
Содан түскен алтыны мен қолға мыс.
Солай түскен өнер дәні уысқа,
Зиялылар жұмбақ сырға жуысса.
Жатыр дескен не ғажаптың ұрығы
Ақ тарының қауызындай қуыста.
Олар сол бip қасиетті ұрықтан
Ұлғайысып бipiн жетік бipi ұққан.
Күн көзіне қарай білген қасқайып,
Қорықпаған бұталық пен құрықтан.
Екеуара кескілессе, кек деген
Төккен терден қалып етте кеппеген.
Қарсыласты тілім титтей қорласа
Дейтін солар өзім өліп кетпек ем.
Қарсыластың қатты сөзі тиімді
Қара нандай қандыра алса иінді.
Қарсыластар бipiн-бipi күшейтсе,
Оңай ортақ тұжырымдау түйінді.
Ет жүректе — ел пайдасы, наласы,
Мезгілдің де дербес ғұмырнамасы.
Зиялылар есебінше ежелден
Ауыз тұрғай намыстың да нан — асы.
...Дана дәстүр тапса тағы жалғасын
Қадам жасап қалар едік алға шын.
Зиялылар түсінеді; сайыспақ
Бұрынғыдан бетер бүгін арға — сын.
Ашық айтыс аз да болса дем бepiп,
Бұл күн оған бұйыртқандай енді epiк.
Кешегінің кесірінен демек бар
Eceңгipeп қалған жұртты емделік.
Жылт еткенге құрақ ұшып өскен ем,
Зәредейден секем алам, сескенем.
Ойшылдармен салғыласса керауыз
Не сұмдықты алам дереу еске мен.
Пікір айтқыш топ ішінде ендігі
Жоқтар да бар сөзінің еш емдігі.
Көп көзіне көрінбектi кексейтін
Баққұмарға жүктелмейді ел жүгі.
Дандайсыған мансабына мас «төре»
Беделдермен бет тырнаспақ әшкере.
Талас пікір талқыланса күлеміз
Отырғандай соның сөзін хош көре.
Өйтпелік біз, айыпталық ақырын
Кешегінің сол солақай пақырын.
Сауыққасын ол да бәлкім дей алмас:
«Ел тағдыры маған салса, мақұрым...»
Жөнге бағып қатал қыс пен нелер күз,
Бүйте бермей біз де бүтінделерміз.
Басқалардай, бақ-дәулеті тасыған,
Кемел шаққа біртін-біртін келерміз.
Қымызындай сарқылмайтын сабаның,
Оған кепіл — бай мекені бабаның.
Oғaн кепіл — төркінім боп төгілсем,
Тамұқ отын талай кешкен табаным.
Ашқан дәйім шындықтың бет-бедерін
Саған ғана сенім артқан еді елім.
Ойшыл адам! Ортаға шық бөгелмей!
Ортаға шық, бейнеткешім, беделім!

Наурыз, 1997 жыл

---