Шөмішбай Сариев

Денсаулық қайтып келмейді

Бұл бетте «Денсаулық қайтып келмейді» атты Шөмішбай Сариев жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

30.03.2022
0
0
1632

Денсаулық қайтып келмейді,
Ажал айтып келмейді.
Өмірге адам сенсе де,
Өлімге адам сенбейді.
Бір-бірін адам жеңсе де,
Ажалды адам жеңбейді.
Дүниені адам көрсе де,
Өз жүрегін көрмейді.
Біртіндеп өмір өтеді,
Біртіндеп ауру меңдейді.
Бесікте жатқан немерең
Төріңе еркін төрлейді.
Ізіңе ерген інілер,
Сенен де асып өрлейді.
Қия алмай бір күн қоштасып,
Ел-халқың сені жерлейді.
Бір сөнген соң қос жанар,
Енді қайтып көрмейді.
Өмір жолы — ағыста,
Өзен жолын бермейді.
Адам көңілі — құс қанат,
Дүние неткен кең дейді.
Қолын көкке созғандай,
Олай да, бұлай сермейді.
Денсаулық қайтып келмейді,
Ажал айтып келмейді.
Тамырсыз өспес бар әулет,
Бәйтерек дәнсіз өнбейді.
Ұрпағы бар жандарды,
Ажал да мәңгі жеңбейді.

Шөмішбай Сариев денсаулық қайтып келмейді Шөмішбай Сариев өлеңдері

Пікірлер (0)

Пікір қалдырыңыз

Жиі қойылатын сұрақтар