Сәлем саған, қарт Каспий

С. Алтайбекұлына

Аспанменен астасқан баурайың көк,
Баурайыңды жырыммен баурайын деп,
Қарт Каспий, сені іздеп, келдім саған,
Құшағыңда балаңдай аунайын деп.
Қалар ма сен тұрғанда жан дамылдап,
Қарадым ұшаныңа сан таңырқап.
Құшағыңда шомылды қанша балаң,
Құшағыңда шомылды қаншама ұрпақ?!
Тірліктің жуып-шайып жасын тамған,
Тереңінде толқиды асыл маржан.
Тебіренген қарт Каспий — кәрі тарих,
Толқындары сөз алған ғасырлардан!
Ғасыр болып толғандың сөз алдың да,
Жазмыш жазған тағдырдан оза алдың ба.
Дәл осылай толғанып жатты-ау Каспий,
Кешегі бабалардың көз алдында...
Осындай, қандай бақыт, өлкем бары?!
Көгілдір дүниенің көркем бағы.
Бүгіннің жанарынан бір-бір ұшып,
Толғанып жатар Каспий ертең-дағы!
Жүрегінен жалынды отты үзбеген,
Шағалаңдай шарқ ұрып көкті іздеген.
Қарт Каспийге аманат тағдырымыз,
Көкжиекке көзіңді жеткізбеген!..