Өлең, жыр, ақындар

Кім бар

  • 02.12.2015
  • 0
  • 0
  • 3256
Арыстанбыз алысқан алмай қоймайтын,
Аш бөріміз ағызса қанға тоймайтын.
Қолда қуат, бойда сымбат, жүректе от,
Жас батырмыз мыңға жалғыз болмайтын.
Жолға шықсақ, жел жетпес бедеу мінеміз,
Қайрат қозса, қан майданда жүреміз.
Көзге жанар, көкірекке күш болып,
Долданғанда тепсек темір үземіз.
Сырылдатып алысқа жақ тартқанда,
Қозы жаурын оқ жоғалар атқанда.
Өткір қылыш, дүзі құрыш болаттан,
От жарқылдар жауға жалғыз шапқанда.
Жан қиямыз жаудың жүріп соңында,
Иманымыз азаттықтың жолында.
Атақ, алтын, асыл зат бізге керекпіз,
Жиғанымыз жетім - жесір қолында.
Төбесі қар, бауры жібек, түбі тас,
Асқар таулар, мың жасаған түрлі ағаш.
Су сылдыры, жердің гүлі, құс жыры,
Бізді қостап шуылдасар аралас.
Мың сан қолдың ақырып, бетін серперміз,
Жортып жүріп жалаң қылыш сілтерміз.
Жау қанына балдағынан батырып,
Айдарына өткір жүзін сүртерміз.
Қан сасыған, бас төселген майдан бар,
Қанға құмар қайраулы болат қанжар бар.
Бауыздалық қосақтап бірге шығыңдар,
Қарсыласар қайда, қандай жаулар бар.
Қайрылысып қарсы қылыш шабысар,
Көкірекке керіліп найза салысар.
Сұм жүрегін ажал оққа тестіріп,
Кім бар бізбен қан майданда алысар.



Пікірлер (0)

Пікір қалдырыңыз

Ертеректе ер жүрегім

  • 0
  • 0

Ертеректе ер жүрегім,
Ізгі, еркін, ерке еді.
Бар үмітім, ен тілегім
Мәңгі сондай... көрік еді.

Толық

Жазғы дала

  • 0
  • 1

Жайнаған дала,
Ойнаған бала,
Жайылған малмен жабулы.
Керілген көкте,

Толық

Ақталу

  • 0
  • 0

Бұзылған дейді, жынды дейді,
Ісімді көріп көп адам.
Еткенін алған мойнына
Менен дұрыс бар ма жан?!

Толық

Қарап көріңіз