Сүйгенім сен емессің, басқа, жаным

1
Сүйгенім сен емессің, басқа, жаным,
Мен үшін жаралмаған жақсы ажарың.
Сендегі мен сүйетін - ескі дертім,
Баяғы құрып кеткен қасқа шағым.

2
Қадалып көп қарасам кейде саған,
Құмарлық деп ойлама сені аңсаған,
Әлде бір жұмбақ жанмын сөйлескенім,
Дәметпе, саған пайда болмас одан.

3
Іздеймін серігімді сол көне күн,
Іздеймін кескініңнен өзге өңін.
Көзіңнен өшкен жанар нұрын танып,
Іздеймін тірі еріннен семген ерін.

---