Бейбіт қажы, Бейбіт бей, Бейбіт мырза – Сайын Назарбекұлы

Болашақты Жәннәтқа айналдыра,
Алла жолы — һидаәйат, майдан құра,
Бейбіт қажы, Бейбіт бей, Бейбіт мырза,
Сонша ғылым жиды екен қайдан, сірә?
Білім қандай, "О" жақтан, "Бұ" жақтан да,
Ізет қандай, ізгіден бүр атқан ба?
Сабыр қандай, сарғаяр сағыныштан,
Шыдам қандай, көз ілмес ұзақ таңға.
Туған екен адамның ұлы болып,
Шақырыпты сапарға бұны жорық.
Бұ күндері жетіпті арман шыңға,
Жаратқанның саналы құлы болып.
Қайда жүрсең мүсәпір жанындасың,
Бағың содан, байқадым, арылмасын.
Жастайыңнан биік жал аға болдың,
Айналайын алдыңнан жарылғасын.

Алматы-Стамбул-Мекке-Медине.
15.10-27.10.2003 жыл.