Телеграф сымы үзілген жерде

Жатты үзiлiп телеграфтың бiр сымы,
жатты үзiлiп қан тамыры әлемнiң.
Шыр айналған уақыттың ұршығы
қалды осында тұншығып.
Бай-
ла-
ныс-
шы,
қайдасыңдар, жетiңдершi тезiрек!
Дәрiгерлердей
жалғаңдаршы телеграфтың сымдарын, –
жалғаңдаршы қан тамырын әлемнiң.
Жараланды дүние!
Қайдасыңдар,
жетiңдершi тезiрек.
Бiр тамырын берейiн мен суырып
осынау сүмбiл денемнiң,
жалғаңдаршы қан тамырын әлемнiң.
Сымдар, сымдар кеңiстiктi әжiмдеп
дүниенiң денесiне оралған
үзiлдi ме дауылдардан, бораннан;
суырылып құйылғанда жан-жақтан
жiп-жiңiшке өне бойын аралап
қайғылы бiр хабар өткен кезiнде
үзiлдi ме алапат бiр салмақтан.
Жалғаңдаршы тезiрек!
Дүние тұр құшағында қауiптiң,
бұрқ етердей кетсе егер сәл ауытқып,
Бағаналар сирағына жармасып,
жалғаңдаршы тезiрек!
Бал тыныштық тұру үшiн қозғалмай
барлық ел, барлық адамзат
бiр-бiрiмен жату керек жалғасып,
бiр-бiрiне қарау керек көз жазбай!