Музыкалық аспаптар

Музыкалық аспаптар!
Көшеде, үйде, бар жерде
сөйлеңдер шалқып, асқақтап,
музыкалық аспаптар!
Сөйлеңдер, бұрқа, толғанып.
Бар ауыл, барлық қаладан
жатпастан босқа жан бағып,
сендердi қару-жарақтай
шығайық ендi қолға алып.
Тыңдасын, әлем, тыңдасын!
Әйтеуiр сендер арқылы,
сарқылған өзен қарлығып
қырқылған орман шуласын!
Тар қолтықтан оқ тиiп,
тыпырлап жатқан қан басып, –
шiренген сенiң шегiңнен
жаралы құстар зарласын!
Көзiмнен аққан жас болса
пердеңе сенiң тамшылар...
Бiлемiн сенiң бойыңда
оқтардың тажал зуылы,
қираған қала даусы бар.
Музыкалық аспаптар!
Ұмытып қауiп-қатердi,
жүрмеңдер босқа сайранда.
Табиғат, Адам үшiн деп
шығыңдар күрес, майданға,
музыкалық аспаптар!

---