Жылдамдық – Темірхан Медетбек

Жылдамдықтар,
жылдамдықтар,
жылдамдық...
Дене қызып, мың өртенiп, мың жандық,
Зуылдайды төбемнен де, жанымнан
жылдамдықтар,
жылдамдықтар,
жылдамдық...
Жылдамдықтар – дәл осы сәт күшiнде,
бiлiп ал сен мұны мықтап түсiн де.
Көк аспанмен ағып бара жатасың
жылдамдықтар салонының iшiнде.
Зуылдайсың ертектегi жындарша,
жатыр онда жазылмаған жыр қанша.
Көкжиекке сiңiп жоқ боп кетесiң
найзағайлар көзiн ашып-жұмғанша.
Ендiктер бар кесiп әлi өтпеген,
бойлықтар бар мен көрмеген көптеген.
Жас ағызып жылдамдықтың көзiнен
заулап барам, заулап барам көкте мен.
Жақын қалды «ә» дегенше қарашы –
қашықтық пен қашықтықтың арасы...
Сорғалаған жұлдыздармен көктегi
соқтығысып қалар ма екем мен осы?!