Дауылды күнгі теңіз

Қара,
Теңiз алабын
айбар шашып алқынған, –
құз-жартасқа соғады
лек-лек болып толқындар.
Соғады да тебiнiп
құрдымға ол батады...
Келесi лек бәрi бiр
шулап келе жатады.
Күрес жүрiп жатқандай
азаттықты аңсаған.
Соғып өткен шақтарда
күркiреп бiр жар салар.
Лебi шарпып бетiмдi
жүрегiме құйған мұң, –
ереуiлi секiлдi
Чили менен Иранның.
Көрген барлық азапты
бiр-ақ төгiп құярдай.
бұлқынады азаттық
арнасына сия алмай.
Кеудесiне мұң-қайғы
құяды кеп ашынып!..
Шағалалар шулайды
листовка боп шашылып.