Нала

Жерi құт қайнатқан,
Ошағы құрт қайнатқан;
Iбiлiсiңдi iреп,
Албастыңды
Алып ұрып жайратқан;
Бөрiгiн шекелеп киiп,
Осқыра қарайтын;
Шайқап төгiп,
Шалқалап iшетiн;
Сөйлесе –
Көмейi көрiктей керiлiп,
Ауызы астаудай толып,
Алқымы сабадай iстетiн
Еңсесi биiк
Ел болам деп ем!
Өркешi биiк
Ел болам деп ем!
Өзiмнiң қандастарым,
Үйрек жүндi оттастарым,
Қарға жүндi қаттастарым –
Бiреуi жағамнан,
Бiреуi балағымнан алды.
Қағыстым!
Алыстым!
Күн етем деп мен
Қараңғы түндi.
Өз сауысқандарым
Шықылықтап,
Өз қарғаларым
Қарқылдап күлдi.
Өз иттерiм
Арпылдап үрдi.

---