Темірхан Медетбек

Түрмеге ұя салған қарлығаш

Бұл бетте «Түрмеге ұя салған қарлығаш» атты Темірхан Медетбек жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

25.06.2022
0
0
773

Құдай-ау,
Азат қарлығаштың
Түрмеге ұя салғаны несi?
Бостан еркiндiгiн
Қапасқа
Қия салғаны несi?
Әлде байғұс қарлығаш
Түрмедегiлердей
Шерлi ме екен?
Жоқ әлде оларға
Азаттықтың қадiрiн
Ұқтырғысы келдi ме екен?
Тiкенектi сымдардың арасынан
Жалт етiп
Ұшып кiрiп,
Жалт етiп
Ұшып кетедi.
(Сол кезде
Мына сұп-сұр
Суық дүние
Алабұртып ысып кетедi).
Сонда да, құдай-ау,
Азат қарлығаштың
Түрмеге ұя салғаны несi?
Бостан еркiндiгiн
Қапасқа қия салғаны несi?
Әлде
Байғұс қарлығаш
Мына өмiрден безiнiп
Қапа болды ма екен?
Жоқ әлде
Түрме сыртындағы
Азат тiршiлiк
Түрмеден де
Қатал болды ма екен?..

Темірхан Медетбек түрмеге ұя салған қарлығаш Темірхан Медетбек өлеңдері

Пікірлер (0)

Пікір қалдырыңыз

Жиі қойылатын сұрақтар