Махаббат

Сен дегенде –
Талай-талай адамдар –
Дүниеден баз кешiп
Безiп кеткен.
Ғұмырларын мансұқ етiп
Жаhанды
Кезiп кеткен.
Алдынан –
Тау өсiп шықса да! –
Жанталасып
Асып өткен.
Жолына –
Ақ қар, көк мұзды
Төсеп тастаса да
Басып өткен.
Құммен бiрге көшкен.
От дариясын кешкен.
Сен үшiн –
Екi елдiң
Iргесi сөгiлiп
Дауласқан.
Сен үшiн –
Мемлекеттер
Қылыш суырысып
Жауласқан.
Жолың – азап! –
Айналаң түн болған.
Сен үшiн –
Төлегендер өлiп,
Мәжнүн, Қарагөздер
Жынданған.
Сен егер –
Жақұт болсаң –
Қолға ұстауға болмайтын –
Қасиеттi жақұтсың.
Сен егер –
Бақыт болсаң –
Қасiреттi бақытсың.