Темірхан Медетбек

Жылқы жылы

Бұл бетте «Жылқы жылы» атты Темірхан Медетбек жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

20.06.2022
0
0
1059

Жылқы жылы келдi.
Көсiлiп шапқанда
Жердi қуырып жiберген, –
Шаңын көкке көтерiп
Кебектей суырып жiберген;
Бауыры
Даладай жазылған;
Тұяғы түскен жерлерi
Құланның етiн асатын
Ошақтай қазылған;
Алтайда кiсiнеген дауысы
Атырауға жеткен;
Тiптi
Атыраудан да өткен;
Оттай лапылдап,
Оқтай зулаған;
Мойнына
Құрық салдырмай тулаған;
Болат тұяқтары
Қарсы жатқан тастарды
Қамырдай илеп,
Бауырдай тураған;
Құйрығы
Өзендей созылып,
Жалы
Ормандай шулаған;
Қарсы келгеннiң
Құтын қашырам деп,
Атыңды асқақтатып,
Абыройыңды асырам деп, –
Жерiмдi
Дүбiрге толтырып,
Кеудемдi
Мың үнге толтырып, –
Жылқы жылы келдi!
Құт болсын!

Темірхан Медетбек жылқы жылы Темірхан Медетбек өлеңдері

Пікірлер (0)

Пікір қалдырыңыз

Жиі қойылатын сұрақтар