Шошыну

Аурумын!
Алтайым да ауру,
Сарыарқам да ауру,
Қаратауым да ауру,
Алатауым да ауру,
Атырауым да ауру.
Ауру!
Ертiстiң тамырын ұстадым,
Жайықтың тамырын ұстадым,
Сырдарияның тамырын ұстадым,
Тобылдың тамырын ұстадым,
Есiлдiн тамырын ұстадым,
Iленiң тамырын ұстадым, —
Апыр-ай!
Дерттi жанның тамырындай
Соғып тұр! —
Бiрде тартылып,
Бiрде талып тұр.
Сонда да көнбестен
Биiкке өрлеп ем, —
Топан су сарқырап құйылып
Құлатты.
Байқайсың ба,
Аспандағы қара бүлттар
Менi көмiп тастайтын
Күздегi қап-қара
Топырақ сияқты.

---