Өтірік айтылған күні

Мына өтiрiктен –
Қазақстан қалаларының
Бүкiл көшелерiндегi
Бағдаршамдардың
Қызыл,
Сары,
Жасыл көздерi
Ағып түстi.
(Сол бiр өтiрiк
Жұрттың жан-жүрегiн
Аяздай қарып түстi).
Бұрылыстар мен қиылыстар
Күрмеп байланған
Жiптей боп қалды.
Машиналар –
Ханталапай кезiндегi
Үйме-жүйме асықтардай –
Шiк пенен бүктей боп қалды.
Айқай-шу.
Боқтық.
Газ иiсi.
Боздаған машина...
(Өркениет деген осы ма?!)
... Қазақстан қалаларындағы
Бағдаршамдар
Қайтадан жанар ма екен?!
Заманның
Бұрылыстары мен қиылыстарына
Алаң боп –
Қызыл,
Сары,
Жасыл көздерiмен –
Қайтадан! –
Қарар ма екен?!
Бiлмедiм!