Күздегі алаң-көңіл

Сарыала жапырақтардың
Жыртып-жыртып лақтырған
Сарыала қағаздардай боп
Бұрқырап ұшуын-ай.
Әлдебiр
Мұң мен шерлердiң
Талма тұсымнан
Қысқаштай тiстеп
Жiбермей қысуын-ай.
Қалада жүрсем де
Далада қалғандай
Көңiлiм ырың-жырың.
Мына дүние
Қасқыр тартып кеткендей
Жырым-жырым.
Ту сыртымнан аңдып
Жымып жүгiрген
Тұла бойы жүн-жүн
Iбiлiс пен Дүлей жүргендей.
Әйтеуiр айналамда
Көздерi алақтаған
Қаптаған Үрей жүргендей.
Апыр-ау,
Ұйтқыған мына желдiң
Жағымнан
Тартып-тартып жiберiп
Ұрып қашатыны несi?
Алматымның үстiн
Қайта-қайта кеп
Жалба-жұлба
Бұлт басатыны несi?!