Иттердің таласы

Алып Қазақстанның
Түкпір-түкпірінен келген
Алпауыт иттер
Үлкен Шаһардың ішінде
Таласуда!
Соларды қарап тұрып
Ақ тер, көк тер боп
Түсесің қара суға !
Иттер таласуда !
Біздің
Алыпсоқ , Бөрібасарларға
Түрлері келгенмен
Үргені мүлде бөтен
Ит біткен қаптап жүр.
Оларды қоңқақ тұмсық,
Қиық көз жат жұрттықтар
Арқаларынан қағып,
Бастарынан сипап баптап жүр.
Талас басталды !
Ортаға щыққан екі төбет
Көздері қып- қызыл боп,
Тістері сақ- сақ етіп
Бір- бірін бас салды.
Қарш-қарш !
Арс-арс !
Тістескен қос төбет –
Сұмдық-ай ! –
Қап-қара құйынға айналып
Құтырып барады.
Мына дүние
Апалаң-топалаң
Сұрапыл шайқасқа
Жұтылып барады.
Біреуі желкеден алып,
Біреуі қасадан қапты.
Қып-қызыл қан
Жоса боп ақты.
Атаңа ғана лағынет –
Мына бір сұр төбет ! –
Жерге қаратты-ау
Дүйім бір елді !
Олай демей не дерсің ! –
Оны әне бір
Күйедей қара төбет
Адырнадан ұшқан
Жебедей атылып кеп
Алқымынан алып
Кеңірдегін қиып жіберді.
Жұрт біткен
Дуылдап кетті.
Дауылды күнгі
Ормандай боп
Шуылдап кетті.
Тағы да
Талас басталды !
Қанқызыл төбет пен
Ақ ала төбет
Бір-бірін бас салды.
Құдай-ау,
Неткен долылық,
Неткен бетпақтық,
Неткен өшпенділік ! –
Қанқызыл төбет
Сұрапыл екен ! –
Әп дегенннен
Ала төбетті
Алмас тырнақтарымен
Төстен бүріп
Болаттай азу тістерімен
Шақыр-р-р еткізіп
Жағын
Айырып тастады.
Сонан соң
Күтір-р-р еткізіп
Мойынын
Қайырып тастады...
Талас
Тағы да басталды.
Тағы да,
Тағы да,
Тағы да ! –
Талай төбеттің
Соры мен бағына...
...Дәл қазір
Алып Қазақстанда
Алпауыт иттер
Жан беріп,
Жан алып таласуда!
Дүние адасуда!
Адасуда!