Тақта отырған тұтқын

(Диктаторлар мен деспоттарға)

Алдап сөйлейсің,
Жаныңды
Жалдап сөйлейсің.
Халқыңды
Құтандай көріп
Байлап сөйлейсің.
Не деген ұтқырсың!
Бірақ бәрі – бір
(Жұрт біліп отыр ғой)
Тақта отырсаң да
Тұтқынсың!
Сенің бар жағың
Барқытпен қапталып,
Мақпалмен түптелген.
Алтынмен апталып
Күміспен күптелген.
Жан-жағың алдау,
Жан-жағың қанау,
Жан-жағың қамау,
Жан-жағың...
Алау да далау.
(Сен бәрі-бір
Кетіп барасың,
Жұлдызың сөніп,
Айың жылжып
Өтіп барасың).
Бірақ сен оны
Құлаққа ілмейсің, –
Қаншама айтса да
Білгіштер...
... Тақта отыр ғой,
Тақта отыр ғой,
Сол тақтың тұтқыны
Ең басты қылмыскер.