Сапардан соң

Мен
Кейінгі кезде
Бір тыным таппаймын.
Саудагерлердей
Көп жүріп кеттім.
Іштегі бір дауыс
Айқай салды:
Өзіңді бүйтіп кемітпе,
Көк түрік тектім!
Мен шынында
Кейінгі кезде
Көп жүріп кеттім.
Алтайға барып ем,
Алтай тауым
Бауырында жатқан
Бұлттың бәрін
Сыпырып тастап
Келдің бе! деп
Жар салды.
Маңғыстауға барып ем
Маңғыстауым
Кәрі Каспийдің
Толқындарымен бірге
Қол соғып қарсы алды.
Оңтүстікке барып ем,
Оңтүстігім
Қара суыма
Бал салды.
Теріскейге барып ем,
Теріскейімнің
Топ-топ боп тұрған
Қарағай, қайыңдары
Құрметіме ән салды.
Менің сонда
Ойыма
Өрттей от толды.
Жаным жаралы болатын,
Жарасы жоқ болды.
Қайтадан
Қабыландай айбаттандым,
Қара нардай қайраттандым.
Тартысқандарды
Ту-талақай етіп
Шалып жығатындай,
Алысқандарды
Ит сілікпесін шығарып
Алып ұратындай болдым.
Болдым,
Толдым!