Аспандағы аласапыран – Темірхан Медетбек

Бәрі тыныш болатын
Аспандағы
Ақ боз атпен
Көк боз ат —
Әдеттегідей! —
Темірқазыққа
Байланып тұрған;
Оларды қалайда алам деп
Жеті қарақшы —
Әдеттегідей! —
Айналып тұрған...
Бір кезде
Сұрапыл бір үндер
Тілгілеп көкті
Дүбірлеп кетті.
Жеті қарақшыдан емес
Жердегі сұмдықтардан
Үркіп шошыған
Көк боз ат
Темірқазыққа байлаулы
Шылбырын үзердей боп
Көкке қарап
Кісінеп тұрды.
Үркіп шошыған
Ақ боз ат
Темірқазыққа байланған
Шылбырын үзердей боп
Жерге қарап
Кісінеп тұрды.
Алапат құдірет көрді!
Ақ боз ат пен
Көк боз ат
Жердегі сұмдықтан үркіп
Шапшыған кезде
Темірқазықты
Жұлып кете жаздады...
Осы бір сәтте
Ақ боз ат пен
Көк боз ат қана емес,
Темірқазыққа
Байлаулы тұрған
Бүкіл дүние
Құрып кете жаздады...
Әйтеуір бұл жолы
Құдай сақтады.