Жұмбақ – Темірхан Медетбек

Бір жұмбақ айтайын —
Шешсең —
Мына менен
Қалайтыныңды ал.
... Менің кейде
Космосқа шығып
Қарайтыным бар:
Жердің сонау шетінде
Жалды бір арыстан
Құйрығымен
Жер сабалап
Шабынып тұр.
Біреулер оған
Мән бермей,
Ал біреулер
Жағынып тұр.
Әне бір елде
Үстінде —
Қару-жарағы,
Қасында есегі,
Балп-балп басып
Сауырлы піл барады.
Сол бір кезде
Мына бір шеттен
Қоңыр аюдың
Омартаға қарай
Мойынын бұра бергені...
Осыны күткендей
Алып айджаһардың
Жыныс ішінен
Аранын ашып
Шыға келгені...
Әне бір жақта
Өзін өзі
Керемет көріп
Сиыр жүр...
... Осылардың
Аяқтарына оратылып
Кішкентай бір қанден
Бір олай жүгіріп,
Бір былай жүгіріп
Шәуілдеп үріп жүр...
Шешуін тап!