Мені іздеу

Ондаған жылдар өтіп
Мені іздеген біреулер
Таба алмады.
Таба алмастан
Арандады:
Бұлттарды
Аударып қарап еді
Құтырып шатырлаған
Қып- қызыл найзағайларға
Қолдарын
Пісіріп алды.
Сонан кейін
Көзелерге
Үңіліп қарап еді
Көзелерді—
Қолдарынан!—
Түсіріп алды...
Енді олар
Суға кірді.
Су біткен
Бу болып
Ұшып кетті.
Мұнысы не деп
Біреулер
Жіптей жіңішкеріп,
Біреулер
Күптей боп
Ісіп- кепті...
Іздеп- іздеп
Биік- биік
Қамалдарға барды.
Тапсақ
Осыдан табамыз деп
Ақ ордаға барды.
Таба алмады.
Шаршап- шалдығып
Айдаладағы
Бір үйге келді.
Жапырайған,
Сырты сыланбаған
Қотыр екен.
Мен сол үйдің
Босағасында
Отыр екем...

---