Таудағы ақ шатырлар

Тау бауыры гүлденген,
Кезі июнь айының,
Жапырақтарға бөленген
Қарағай, арша, қайыңын.
Ертеңменен Талғардың
Шың басынан күн асып
Шыққанын мен аңғардым,
Кірпігінен нұр шашып.
Күнмен көзге шағылып
Тау басында ақша қар,
Мөлдір шыққа малынып
Балбырады бақшалар...
Қаңқылдасып, шуласып,
Сүңгіп суға үйрек, қаз,
Ақ көбелек гүлге асық,
Зулап ұшып болған мәз.
Аспанменен таласқан
Алатаудың қойнында, —
Лагерьге көркі жарасқан
Балалар жүр ойында.
Сол лагерьдің көркіндей
Алмалы жасыл бақша тұр.
Алаң төрін еркіндей
Жағалай қонған ақ шатыр.
Алқаны шатыр кең салып,
Тігіліпті қаз-қатар,
Балалардың демалып,
Мекені бұл жаз жатар.
Балалар жетік сабақта,
Бітіріп оқу маусымын,
Жұтады денсаулыққа
Таза ауасын, тау суын.
Шатырлардың төрінде
Желкілдеген қызыл ту.
Сол бір тудың түрінде
Күндей сөнбес қызу тұр!

---