Темір жол

Николай Сидоренкодан

Жол салып, ән қосқандар,
Күрегі қолда жарқырап,
Төселді ауыр шпалдар
Үйілді қойтас, топырақ.
Көтеріңкі террасы,
Дачалар бұға қараған,
Жүйткіді поезд жорғасы,—
Көк жалы бұлтты ораған.
Паровоз оттай қайнаған
Көбіктей буы ойнайды,
Әскерше киген бір адам
Вагоннан қолын бұлғайды.
Жымия күліп, сызыла
Қол бұлғаймын мен де оған,
Вагондарға қызыға
Түтіндете зулаған.
Жол болсын дос! Бас қадам,
Тұрарсың алыс перронда,
Онда да керек жақсы адам,
Жақсы адам керек онда да.
Тағы да әнін қосқандар
Жаңғыртты ішін орманның,
Төселді ауыр шпалдар
Төсіне суық құмдардың.
Құстар да қанат қомдана
Қарағай, қайың басынан
Қарайды бейне таңдана
Темір жолға жосылған.
Жақында шың-шың балға үні
Естіледі құлаққа,
Бригаданың барлығы
Келген жоқ әлі құдыққа.
Естіліп тұр дүрсілі,
Поездың кеткен алысқа,
Әлдекім ауыр күрсінді,
Үнсіз, қарап шығысқа.