Вокзалда – Тайыр Жароков

Сұр брезент азық қоржын иықта,
Құлақшынын баса киіп басына,
Шолақ тонды солдаттар шат, миықтан
Күліп қойып, поезд күткен асыға.
Біреу қырға, біреу село, қалаға,
Біреулері бармақ болып шахтаға
Жүрген кезде перрондағы алаңда,
Жеті эшелон вагондары сап құра.
Ал асыққан солдат легі тезірек
Билетсіз-ақ отырыңдар поезға!
Қарсы алады сізді елдің өзі кеп,
Келулерің ой да салар кей қызға...
Шымшып беттен шымыр аяз шытырмақ
Шығарып сап перрондағы әскерді,
Керзі етікпен басқан жері сықырлап
Вагондарға қылқандай кіл жас кірді.