Жанымда менің жаз үні

Менің кейбір құрбыларым назданып:
– Тәке, неге лириканы аз жазып
Жүрсіңіз? – деп, мін тағады, – жүрекке
Күз жеткен бе, сізден көктем, жаз қалып?..
Бәлкім, осы олардың жай әзілі
Болса дағы болмас пікір қазығы,
Күзі несі? – Жанымда әлі жаз үні,
Көңілімде қаңқылдаған қаз үні...
Әділ ойды кім кетеді тыңдамай,
Әр ақыннан шыққан, бірақ, үн қалай?
Түсінбеймін, лирика – тек сүю ме? –
Лириканы түсінеді кім қалай?
Лирика – тек, қыз бен гүлдің жыры ма,
Өліп-өшкен ғашықтың, ия, сыры ма?
Содан кем бе, жұрттың жаны жай тауып,
Өмір жайлы тұрса – жырға жылына...