Өлең, жыр, ақындар

Кавказ шыңы

  • 11.07.2022
  • 0
  • 0
  • 544
Кәрі Каспий, Қара теңіз
Толқыны ойнап, көкке буы
Көтерілді, теңізге егіз
Тау қарауыл Кавказ шыңы.
Қос теңіздің алқасында
Тау кеудесі көкке мезгеп,
Жалтыр мұзы жартасында
Арарат пен тұрды Қазбек.
Бейне меруерт себілгендей
Тау басына көк жұлдызы;
Биік көкте көрінгендей
Эльбрустың күміс мұзы.
Ақбас таудың аясынан
Асып алтын ай шыға алмай,
Атлас аспан саясынан
Тұрды сол кез күн шыға алмай..
Жартаста ұшып жарғанаттар,
Жорытты аңдар жотадағы,
Шырт ұйқыда шың, құз, шаттар,
Ұшты тек тау жапалағы.
Зеңгір Кавказ биігінен
Саяқатты соғып самал,
Тұрды үркіп мүйізінен
Айға қарап бұғы, марал.
Түн тағысы жортып жүрген
Жолбарыстан аю бұғып,
Я, түлкінің күшігі үрген,
Я, әр жерден қасқыр ұлып...
Арайында атар таңның
Таң желі есіп аңқылдайды,
Анда-санда тау қыранның
Тек дауысы саңқылдайды...
Ұясынан таңды сезіп,
Қарлығаш та қырындайды;
Таң әншісі тұрған төзіп
— Бозторғай да шырылдайды...
Тау дем алып ұйықтап жатты
Мұз көрпеге оранғандай,
Жерде адамзат қимылдапты
Ұйқысынан оянғандай...
Гори қала нақ қасында
Жартасына толқын ұра,
Ақты өзендер алқасында
Лиахва мен сұлу Кура.

1937



Пікірлер (0)

Пікір қалдырыңыз

Қыз кеткен

  • 0
  • 0

Амудария бойында
Мың ба, бұрын,— жүз кетпен
Жер қазып, су бұрғанда.
Өзенге бір қыз кеткен.

Толық

Днепрде

  • 0
  • 0

Кемесінде Горькийдің
Жүздім бойлап Днепр,
Сұлу өзен көркін бір
Керіп достар бірге отыр.

Толық

Қалба құзы

  • 0
  • 0

Көп таудың бірі Арқада Қалба тауы,
Ақ құндақ асыр салған — аңға тауы.
Шыңғыстың хандығында қытай-моңғол,
Жорытып, батқан талай қанға тауы...

Толық

Қарап көріңіз