Туған жер – Гүлмекен Қасенбай

Туған жер

Әлі есімде,​
алғаш табан тиген бел,
Жығылғанда маңдайымнан сүйген жер!
Бұйра жондар тосып томпақ арқасын,
Самай шашпен ойнаушы еді ерке жел!

Ағаштардың​ ​ бұтақтары иіліп...
Жемістерден түрлі көйлек киініп!
Егіс басы у-ду болып жататын,
Бидай, картоп, жүгерісі жиылып!

Ер-азамат, мініп алып көлікке,
Кірісетін күн шықпастан көп іске!
Бала біткен ат қып мініп таяқты,
Қой жаюға шығатын-ек өріске!

Ал аналар....
қолдары еш тимейтін,
Сиыр сауып,​
тандырға нан илейтін!
Үйі толы қонақ келіп жатса да,
Қабақ шытып, кейуді бір білмейтін!

Аталардың сақалдары ақ жібек,
Әжелердің кимешегі желбіреп!
Айт пен тойда әзілдесіп жататын,
Немересін алдына алып, әлдилеп!

Қыз - бозбала күлім қағып, жайраңдай,​
Су шашысып,​ боп жүретін малмандай.
Жотасынан жусан иісі бұрқырап,
Ай нұрына шомған түнгі дөң қандай!

Ошақтары жылт-жылт етіп әр үйдің,
Алуан түрлі тағам иісі аңқитын...
Қонақ болып келе қалса сұлу қыз,
Жігіт біткен,​
дәл сол үйді аңдитын!

Өз әлемі,​ тірлігі бар қайнаған,
Туған жерім -
Сүмбе аулы жайнаған!
Атақоныс Албандардың мекені,
Тянь-Шанның сілемдерін жайлаған!

Аймағымыз - Алматыға қарайды,
"Қазақпыз біз" -
Жүзі ашық,​ арайлы...
Тәуелсіз ел, түркілерден тараған,
Қазақстан...
Таңдай қақтыр талайды...!!!

25.09.2019