Ленин

Адамзаттың бақытына
Саты,
Аят, хадис уақытына
Аты.
Бұл дүниенің пайғамбары
Ленин.
Төмен таптың ой-айбары
Ленин.
Ғылым, тарих қағидасы
Өзі.
Бағыт, жоба, ұйым басы,
Тезі.
Төмен таптың қолбасшысы
Ленин.
Жаңа тұрмыс жолбасшысы
Ленин.
Жалшыларға жалпы азаттық
Байдан.
Не теңелмек, не қазаттық
Майдан.
Бостандықтың таң азаны
Ленин.
Саясаттың мыс қазаны
Ленин.
Шам-шырағы ақиқаттың
Жанған,
Айқын жолы адамзаттың
Шаңқан.
Зор майданның ұраны да
Ленин.
Келешектің құраны да
Ленин.
Құрастырған, сорлыларды
Жиған.
Рухтандырған жарлыларды
Иман.
Алтын сәуле күннің нұры
Ол таң.
Қара албасты түннің соры
Шолпан.
Қажымас ер, ол — қызыл ту
Құрыш.
Буржуаның жанына у,
Бұрыш.
Жас буынға үлкен аға —
Ол бас.
Осылай деп бердім баға,
Жолдас.

1923 жыл, 30-қараша, Теке

---