Ғабеңнің жұлдызы

Мөп-мөлдір сезім іздесең,
Елестер көзге мұздай таң.
Зергері сөздің кім десең,
Алдымен, Ғабе, сізді айтам.
Алыптар тобы қалдырған
Дәстүрді сақтап әкелдің.
Ізіне ерген балдырған
Би ағаң менен Сәкеннің.
Тулаған өмір толқынын
Өзің де бастан кешірдің.
Жырладың қазақ батырын,
Ардақтап ана есімін.
Өзіңдей талант ілуде
Бір ғана туар жаңғырып.
Қазақтың өнер көгінде
Жұлдызың жанар мәңгілік.

---