Талғар

Алатауда асқақтаған Талғар шың,
Талғар шыңда қыран қанат қомдансын.
Абыз жүрек аңыз жайлы толғансын,
Көне тарих келешекке жалғансын.
Тарихымды танымауым ұят-ты,
Талғар десе – көкіректен күй ақты.
Жалғастырған жеті жұртын жаһанның
Жібек жолы – жүрек жолы сияқты.
Жібек жолы...Үйсін, Сақтар даласы,
Жібек жолы...Жетісудың саласы,
Жібек жолы...Алатаудың бөктері,
Жол бойында тарлан Талхиз қаласы.
Қасиетті Түркістанмен қолдасқан,
Бағдат, Мысыр, Шын-Машынмен жалғасқан.
Керуен сарай...кернейлеткен базарын
Талхиз шаһар тіршілігі талмастан.
Жолаушыға жайып салып дәм-тұзын,
Ұлы Жолда туын тіккен Талхизым.
Адамзаттың тарихының таңында
Арай шашты сан көктемің, сан күзің.
Қаһарланған қағанаттар, хандықтар,
Түбі бірге түркі жұрты – қарлұқтар.
Шыңғыс ханның тепкісін де көтерген,
Талхизімде тектілік пен нарлық бар.
Талхиз шаһар тағдырына таңданып,
Таңбалы тас қалдырыпты таңба қып.
Жетісудың қалалары-ай жерұйық –
Қорғас, Қойлық, қолтықтасқан Алмалық.
Талхиз-тарих толғамайды бекерден,
Дуалдарын қыштан өріп көтерген.
Әз бабалар мұнаралы шаһарға,
Керуендерін келтіріпті шетелден.
Қалайы мен мыстан құйған бұйымды,
Құбыр тартып, құт орнатқан үйіңді,
Бедерінен сипап қайран бабалар,
Ұрпақтарың аруаққа сыйынды.
Бағы заман шежіресін тыңдатқан,
Айқараңғы жұлдыздарын зулатқан,
Алтын адам – ата жұрттың тарихы,
Ғасырлардың қойнауынан тіл қатқан.
Құпиялы құмырадан сұрашы,
Таусылмайды Талғар-тарих куәсі.
Жәдігерлі сырларыңа бақилық
Бағышталған Шоқанымның дұғасы.
Аласапыран заманалар арбасқан,
Жау да болды жағамызға жармасқан.
Шуақтанып сәулесімен өмірдің,
Кәрі Талхиз жас Талғарға жалғасқан,
Талхиз еді Алмалықтың серігі,
Талғар енді Алматыға бел іні.
Талғар қала – ынтымақтың ұясы,
Ырыс-құтпен өркендеген өмірі.
Ата жұрттың асыл затын ұғар кім.
Аман болсақ, туар –Айың, туар – Күн.
Қыран болып саңқылдайды тұғырда,
Туған елі Рысқұлов Тұрардың.
Бабалардың баталарын қоштаған,
Бауыржанның батырлығын бастаған,
Талғар елі тектіліктен айнымас,
Талғар-толғау – толастамас асқақ ән!..

---