Жауынгер жарым оралшы

Жадымнан шықпай, арайлым,
Жолыңа күнде қараймын.
Қоштасқан сол бір сағаттан,
Уақытты өткен санаймын.
Сыр болып назым тарқамай,
Сағындым сені қалқам-ай.
Толқынға тосып жанымды,
Шақырған болам сабырды.
«Торықпа, жаным» – десем де
Қайтейін, сәулем, сағындым.
Сағыныш сазы тарқамай,
Жүрмін ғой аңсап, қалқам-ай.
«Жабықпай жаным жүрші, айым, –
Деп едің, – келші құшайын».
Жауынгер жарым оралшы,
Алдыңнан құс боп ұшайын.
Көңілден көп ой тарқамай,
Сағынып жүрмін, қалқам-ай.
Сағыныш сазы тарқасын,
Оралшы тездеп қалқашым.