Өнерім – өмірім

Өнерге серік – парасат,
Арқауы дерсің тірліктің.
Бағасын біліп қарасақ,
Жинағы дара бірліктің.
Өмірдің бейбіт елшісі,
Өнердің орны тым асқақ.
Жанымның дәру емшісі
Нәрімен жебеп – жүр бастап.
Әсемдік тұнған бар маңы,
Тартқанда өрге арай-шың,
Сезініп тәтті – бал дәмін
Соңыңа сергек қарайсың.
Қазақы жарқын пейілмен
Өнерім болса өрісті,
Шуақты әппақ көңілмен
Әр күнім ғажап келісті.
Бақ құстай талғап қонғаны,
Тәңірдің сыйы, қалауы.
Тұлғаның таза болғаны,
Жүректе болса алауы.
Өнерім менің – өмірім,
Жанымды жаздай жайнатқан.
Өнерім – өшпес өр үнім,
Бұлбұлдай таңда сайратқан.

---